ಪ್ರಸೂತಿ ಸೌಲಭ್ಯ ಮಸೂದೆಯನ್ನು ಕುರಿತು ಡಾ. ಬಿ. ಆರ್. ಅಂಬೇಡ್ಕರ್

*ಪ್ರಸೂತಿ ಸೌಲಭ್ಯ ಮಸೂದೆಯನ್ನು ಕುರಿತು

ಡಾ. ಬಿ. ಆರ್. ಅಂಬೇಡ್ಕರ್: ಮಾನ್ಯರೆ, ಈ ವಿಧೇಯಕದ ಪ್ರಥಮ ವಾಚನವನ್ನು ಅನು ಮೋದಿಸಲು ನಾನು ನಿಂತಿರುವೆನು. ಹಾಗೆ ಮಾಡುವಾಗ. ಈ ವಿಧೇಯಕದ ವಿರುದ್ಧ ಚರ್ಚೆಯಲ್ಲಿ ಎತ್ತಲಾದ ಕೆಲವು ಪ್ರಶ್ನೆಗಳಿಗೆ ಉತ್ತರಿಸಬೇಕೆಂದಿದ್ದೇನೆ. ವಿಧೇಯಕದ ವಿರುದ್ಧ ಮಾತನಾಡುತ್ತ ಸನ್ಮಾನ್ಯ ಸದಸ್ಯರು ಮೊದಲು ಕಾರ್ಮಿಕರ ಪರಿಹಾರ ಕಾನೂನು ಪ್ರಕಾರ ನಾವು ತಿಳಿದುಕೊಳ್ಳು ವಂತೆ ಇದೇನು ಒಂದು ಅಪಘಾತವಲ್ಲವೆಂಬುದನ್ನು ಎತ್ತಿ ತೋರಿಸಿದರು; ಆದ್ದರಿಂದ ಕಾರ್ಮಿಕ ಪುರುಷರ ಪರಿಹಾರ ಕಾನೂನಿನ ತತ್ವವನ್ನು ಪ್ರಸಕ್ತ ವಿಧೇಯಕದ ಲಾಭವನ್ನು ಪಡೆಯುವ ಮಹಿಳೆಯರಿಗೆ ಅನ್ವಯಿಸತಕ್ಕದ್ದಲ್ಲ ಎಂದೂ ನುಡಿದರು. ಮಾನ್ಯರೆ, ಇದು ಅಪಘಾತವಲ್ಲ ಎಂಬುದನ್ನು ನಾನೂ ಒಪ್ಪುತ್ತೇನೆ. ಆದರೆ ಇದರಿಂದ ಸೂಚಿತವಾದ ವಿಧೇಯಕದಲ್ಲಿ ಮಹಿಳೆಯರಿಗೆ ದೊರಕಬೇಕೆಂದು ಬಯ ಸಿರುವ ಲಾಭವು ಅವರಿಗೆ ಪ್ರಾಪ್ತವಾಗಕೂಡದು ಎಂಬರ್ಥವೇನೂ ಆಗುವುದಿಲ್ಲ. ಈ ವಿಧೇಯಕದ ಹಿಂದಿನ ತತ್ವವು ಪಕ್ಷಪಾತದ್ದಾಗಿದೆ. ತಾಯಿಗೆ ಪ್ರಸೂತಿಗಿಂತ ಮೊದಲಿನ ಪರಿಸ್ಥಿತಿಯು, ಅನಂತರ ಮಗುವನ್ನು ಬೆಳೆಸುವುದು ಇವು ಈ ವಿಧೇಯಕದಲ್ಲಿ ಮಹತ್ವದ ಅಂಶವಾಗಿದೆಯೆಂಬ ಸೂಚನೆಯು ಸರ್ವಸಮ್ಮತವಿದೆಯೆಂದು ನಾನು ಸಂಪೂರ್ಣವಾಗಿ ನಂಬುವೆ. ಈ ಸೂಚನೆಯನ್ನು ಯಾರೂ ತಿರಸ್ಕರಿಸುವುದಿಲ್ಲವೆಂಬುದೂ ನನ್ನ ಅನಿಸಿಕೆ. ಆದ್ದರಿಂದ ಮಾನ್ಯರೆ, ರಾಷ್ಟ್ರದ ಹಿತದ ದೃಷ್ಟಿಯಿಂದ ತಾಯಿಯು ಪ್ರಸೂತಿಗಿಂತ ಮೊದಲು ಹಾಗೂ ಅನಂತರ ಸ್ವಲ್ಪ ವಿಶ್ರಾಂತಿ ತೆಗೆದುಕೊಳ್ಳುವುದು ಅವಶ್ಯವಿದೆ; ಇದೇ ತತ್ವದ ಮೇಲೆ ಈ ವಿಧೇಯಕದ ತತ್ವವೂ ನಿಂತಿದೆ. ಮಾನ್ಯರೆ, ಹೀಗಿರುವುದರಿಂದ ಇದರ ಭಾರವನ್ನು ಬಹಳಷ್ಟು ಸರಕಾರವೇ ವಹಿಸಿಕೊಳ್ಳಬೇಕೆಂಬುದನ್ನು ನಾನು ಒಪ್ಪಿಕೊಳ್ಳಬೇಕಾಗುತ್ತದೆ. ನಾನು ಈ ಸತ್ಯಸಂಗತಿಗೆ ಅನುಮತಿ ನೀಡುವೆ, ಏಕೆಂದರೆ ಜನತೆಯ ಕಲ್ಯಾಣವು ಪ್ರಾಥಮಿಕವಾಗಿ ಸರಕಾರಕ್ಕೆ ಸಂಬಂಧಿಸಿದೆ. ಪ್ರಸೂತಿಯ ಸೌಲಭ್ಯಕ್ಕಾಗಿ ಕೆಲವೊಂದು ವೆಚ್ಚವನ್ನು ಸಂಗ್ರಹಿಸಿದ್ದನ್ನು ಸಾಮಾನ್ಯವಾಗಿ ಎಲ್ಲ ದೇಶಗಳಲ್ಲಿ ನೀವು ಕಾಣಬಹುದು. ಹೀಗಿರುವಾಗ ಮಾನ್ಯರೆ, ಇಂಥ ಪರಿಸ್ಥಿತಿಗಳಲ್ಲಿ ಮಹಿಳೆಯರನ್ನು ಕೆಲಸಕ್ಕಾಗಿ ನೇಮಿಸಿಕೊಂಡ ಯಜಮಾನ ಇಂಥ ಸೌಲಭ್ಯಗಳನ್ನು ಮಾಡಿಕೊಡುವ ಹೊಣೆಗಾರಿಕೆಯಿಂದ ಸಂಪೂರ್ಣ ಮುಕ್ತನಾಗಿರುವನು ಎಂಬುದನ್ನು ನಾನು ಒಪ್ಪಿಕೊಳ್ಳಲು ಸಿದ್ಧನಿಲ್ಲ; ಇದಕ್ಕೆ ಕಾರಣವೂ ಇದೆ. ಕೆಲವೊಂದು ಉದ್ಯಮಗಳಲ್ಲಿ ಮಾಲಿಕನು ಹೆಣ್ಣಾಳುಗಳನ್ನು ನೇಮಿಸಿಕೊಳ್ಳುವುದರಲ್ಲಿ ಸಂಶಯವಿಲ್ಲ; ಗಂಡಾಳು ನೇಮಿಸಿಕೊಂಡಾಗ ಸಿಗುವ ಲಾಭಕ್ಕಿಂತಲೂ ಹೆಚ್ಚು ಲಾಭವು ಹೆಣ್ಣಾಳು ನೇಮಿಸಿಕೊಂಡಾಗ ಮಾಲಿಕನಿಗೆ ದೊರೆಯುತ್ತದೆ. ಗಂಡಾಳುಗಳ ನೇಮಕಕ್ಕಿಂತಲೂ ಅದೇ ಪ್ರಮಾಣದಲ್ಲಿ ಹೆಣ್ಣಾಳು ಇರುವಾಗ ಬಹಳಷ್ಟು ಲಾಭವು ಮಾಲಿಕನಿಗೆ ಲಭಿಸುವುದು. ಹೀಗಿರುವಾಗ, ಗಂಡಾಳುಗಳ ಬದಲಾಗಿ ಹೆಣ್ಣಾಳು ಗಳನ್ನು ನೇಮಿಸಿಕೊಂಡು ಮಾಲಿಕನು ವಿಶೇಷ ಲಾಭವನ್ನು ಪಡೆಯುತ್ತಿರುವಾಗ, ಕೆಲವು ಮಟ್ಟಿ ಗಾದರೂ ಮಹಿಳೆಯರಿಗೆ ಪ್ರಸೂತಿ ಸೌಕರ್ಯ ದೊರಕಿಸುವಲ್ಲಿ ಮಾಲಿಕನ ಹೊಣೆಗಾರಿಕೆಯಿದೆ ಎಂಬುದು ಸಂಪೂರ್ಣವಾಗಿ ಸಕಾರಣವಾಗಿದೆ. ಪ್ರಸೂತಿ ಸೌಲಭ್ಯದ ವಿಷಯದಲ್ಲಿ ಸರಕಾರಕ್ಕೂ ಸ್ವಲ್ಪ ಹೊಣೆಗಾರಿಕೆ ಇರಲೇಬೇಕೆಂದು ಹೇಳಿದರೂ ಸಹ, ಇಂದಿನ ಪರಿಸ್ಥಿತಿಗಳಲ್ಲಿ ಯಜಮಾನನಿಗೂ ಹೊಣೆ ಗಾರಿಕೆ ಇರಲಿ ಎಂದು ಆಶಿಸುವ ಈ ವಿಧೇಯಕವು ಸಂಪೂರ್ಣವಾಗಿ ತಪ್ಪಾಗಿದೆಯೆಂಬುದನ್ನು ನಾನು ಒಪ್ಪಿಕೊಳ್ಳುವುದಿಲ್ಲವೆಂದು ತಿಳಿಯಬಯಸುವೆ. ಈ ದೃಷ್ಟಿಯಿಂದ ನಾನು ವಿಧೇಯಕವನ್ನು ಅನು ಮೋದಿಸುವೆ.

ಈ ವಿಧೇಯಕವು ಕೇವಲ ಕಾರಖಾನೆಗಳಿಗೆ ಸಂಬಂಧಿಸಿರುವುದೆಂದೂ, ಬೇರೆ ಉದ್ಯಮಗಳಿ ಗಾಗಲಿ ಅಥವಾ ಕೃಷಿ ಉದ್ಯೋಗಕ್ಕಾಗಲಿ ಸಂಬಂಧವಿಲ್ಲವೆಂದೂ ಹೇಳಲಾಗಿದೆ. ಉತ್ತರ ಬಹಳ ಸರಳ ವಾಗಿದೆ. ಯಾವ ಉದ್ಯಮಗಳಲ್ಲಿ ವಿಶೇಷವಾಗಿ ಮಹಿಳೆಯರ ಆರೋಗ್ಯಕ್ಕೆ ಬಾಧಕವಾದ ಪರಿಸ್ಥಿತಿ ಗಳಿವೆಯೋ ಅಂಥವುಗಳಲ್ಲಿ ಈ ತತ್ವವನ್ನು ಅಳವಡಿಸಲಾಗಿದೆ. ಕಾರಖಾನೆಗಳಲ್ಲಿರುವಂತೆ ಕೃಷಿ ಹಾಗೂ ಇನ್ನಿತರ ಉದ್ಯೋಗಗಳಲ್ಲಿ ಕೆಲಸ ಮಾಡುವ ಮಹಿಳಾ ಕಾರ್ಮಿಕರ ಆರೋಗ್ಯಕ್ಕೆ ಬಾಧಕವಾಗುವ ಅಪಾಯಗಳಾಗಲಿ ಅಥವಾ ಇತರ ಅಂಶಗಳಾಗಲಿ ಇರುವುದಿಲ್ಲ. ಈ ಕಾರಣಕ್ಕಾಗಿಯೇ ಇಂಥ ಶಾಸನ ರಚನೆಯನ್ನು ಸಾಮಾನ್ಯವಾಗಿ ಕಾರಖಾನೆಗಳಿಗೆ ಮಾತ್ರ ಸೀಮಿತಗೊಳಿಸುವರು. ಪುರುಷ ಕಾರ್ಮಿಕರ ಪರಿಹಾರ ಕಾನೂನಿನ ಬಗ್ಗೆಯೂ ಇದೇ ಮಾತನ್ನು ಹೇಳಬಹುದು. ಇದೇ ಕಾರಣಕ್ಕಾಗಿ ಕಾರಖಾನೆ ಗಳಲ್ಲಿ ದುಡಿಯುತ್ತಿರುವಾಗ ಸಂಭವಿಸಬಹುದಾದ ಅಪಘಾತಗಳಿಗೆ ಈ ಕಾನೂನು ಅನ್ವಯಿಸುತ್ತದೆ; ಈಗ ಈ ಶಾಸನ ರಚನೆ ಕಾರಖಾನೆಗಳಿಗೆ ಮಾತ್ರ ಅನ್ವಯಿಸಿದ್ದು, ಇನ್ನುಳಿದ ಉದ್ಯಮಗಳಿಗೆ ಇದು ಸಂಬಂಧಿಸಿಲ್ಲ.

ಈಗ ಉದ್ಯಮಗಳ ಮೇಲೆ ಬೀಳುವ ಭಾರದ ಬಗ್ಗೆ ಮಾನ್ಯ ಸಾಮಾನ್ಯ ಸದಸ್ಯರು ಹೇಳುತ್ತ ಈ ವಿಧೇಯಕದಿಂದ ಮಜೂರಿ ಕಡಿಮೆಯಾಗುವ ಸಂಭವವಿದೆಯೆಂದು ನುಡಿದಿರುವರು. ಮಜೂರಿ ಕಡಿಮೆಯಾಗುವುದು ಎಂಬುದರ ಬಗ್ಗೆ ನನಗೆ ಖಾತ್ರಿ ಇಲ್ಲ. ಒಂದು ವೇಳೆ ಹಾಗೆ ಆದರೂ, ಉದ್ಯಮದ ಮೇಲಿನ ಭಾಗವು ಕೆಲವು ಮಟ್ಟಿಗೆ ಬೇರೆಡೆಗೆ ಹಸ್ತಾಂತರವಾಗುವುದು; ಆದ್ದರಿಂದ ಈ ಕಾರಣದಿಂದ ಮಾನ್ಯ ಸದಸ್ಯರು ವಿಧೇಯಕವನ್ನು ವಿರೋಧಿಸುವ ಕಾರಣವಿಲ್ಲ. ಈ ವಿಧೇಯಕವು ಸ್ವೀಕೃತವಾದರೆ, ಬಹುಶಃ ಆ ಭಾರವು ಗ್ರಾಹಕನ ಮೇಲೆ ಬೀಳುವುದು; ಉತ್ಪಾದನೆಯು ಉತ್ಪಾದಕರಿಗೆ ಲಾಭಬರುವಂತಿರುವುದರಿಂದ ಇಂಥ ಉತ್ಪಾದನೆಗೆ ಹೆಚ್ಚಿನ ಬೆಲೆ ಕೊಡಲು ಸಮಾಜವು ವಿರೋಧಿಸಕೂಡದೆಂದು ನನ್ನ ನಿವೇದನೆ.

.                ಚಿತ್ರ - ಅಂತರ್ಜಾಲ 

ಈ ವಿಧೇಯಕವು ಮುಂಬೈ ಪ್ರಾಂತಕ್ಕೆ ಮಾತ್ರ ಸೀಮಿತವಾದುದು ಎಂಬ ಪ್ರಸ್ತಾಪವಿದೆ. ಹೀಗೆ ಮಾಡುವುದು ಅನ್ಯಾಯವಾದುದು; ಅಖಿಲ ಭಾರತಕ್ಕೇನೆ ಇದನ್ನು ಅನ್ವಯಿಸಬೇಕು; ಹೀಗೆ ಮಾಡುವುದ ರಿಂದ ಭಾರತದ ಇನ್ನುಳಿದ ಪ್ರದೇಶಗಳು ಹಾಗೂ ಪ್ರಾಂತಗಳು ಮುಂಬೈ ಪ್ರಾಂತಕ್ಕೆ ಸರಿಸಮಾನ ವಾಗುವುದೆಂದೂ ತಿಳಿಸಲಾಗಿದೆ. ಮಾನ್ಯರೆ, ಇದರ ಬಗ್ಗೆ ನಾನಿಷ್ಟೇ ಹೇಳಬಯಸುವೆ. ಬ್ರಿಟಿಷರು ಭಾರತಕ್ಕೆಲ್ಲಾ ಈ ವಿಧೇಯಕವನ್ನು ಅನ್ವಯಿಸಿದ್ದಾರೆಂದು ಭಾವಿಸೋಣ: ಆಗ ಯಾರಾದರೂ ಒಬ್ಬರು ಎದ್ದುನಿಂತು ಹೀಗೆಯೂ ಹೇಳಬಹುದು; "ಏಕೆ ಈ ವಿಧೇಯಕವು ಭಾರತಕ್ಕೆ ಮಾತ್ರ ಇರಬೇಕು?

ಉಳಿದ ದೇಶಗಳಿಗೆ ಏಕೆ ಬೇಡ: ಪ್ರಪಂಚದ ಇನ್ನುಳಿದ ದೇಶಗಳಿಗಿಂತ ಭಾರತವು ಹಾನಿ ಅನುಭವಿ ಸುವುದು. ಆದ್ದರಿಂದ ಪ್ರಪಂಚವೆಲ್ಲ ಈ ತತ್ವವನ್ನು ಸ್ವೀಕರಿಸುವವರೆಗೂ, ನಾವು ದಾರಿ ಕಾಯೋಣ. ಅಂದರೆ ಪ್ರತಿಯೊಬ್ಬರೂ ನಮ್ಮ ಜೊತೆ ಸರಿಸಮಾನಸ್ಕಂದರಾಗುವರು." ಆಗ ಅವರನ್ನು ತಡೆಯಲು ಶಕ್ಯವಿಲ್ಲ. ಇಂಥ ವಾದದಲ್ಲಿ ಏನೂ ಹುರುಳಿಲ್ಲವೆಂದು ನಾನು ನಿವೇದಿಸುವೆ. ಆದ್ದರಿಂದ ಈ ಪ್ರಾಂತದಲ್ಲಿ ನಮ್ಮ ಕಾರಖಾನೆಗಳಲ್ಲಿ ದುಡಿಯುತ್ತಿರುವ ಬಡ ಕಾರ್ಮಿಕ ಮಹಿಳೆಯರಿಗೆ ಈ ವಿಧೇ ಯಕದಲ್ಲಿ ಯೋಜಿಸಲಾದ ಸೌಲಭ್ಯಗಳು ಈ ವಿಧಾನ ಮಂಡಲದಿಂದ ದೊರೆಯಲೇಬೇಕೆಂಬುದು ನನ್ನ ವಿಚಾರವಾಗಿದೆ.

*ಬಿ.ಎಲ್.ಸಿ. ಡಿಬೇಟ್ಸ್, ಸಂಪುಟ XXIL, ಪುಟ ೩೮೧-೮೨

ದಿನಾಂಕ ೨೮ ಜುಲೈ ೧೯೨೮.

ಮೂಲ - ಡಾ. ಬಾಬಾ ಸಾಹೇಬ್ ಅಂಬೇಡ್ಕರ್ ಅವರ ಸಮಗ್ರ ಬರೆಹಗಳು ಮತ್ತು ಭಾಷಣಗಳ ಸಂಪುಟ-೨